ثقافة ليلى طوبال تصرخ: حين يهان توفيق الجبالي ويكرم عادل امام، نقول على ثقافة تونس السلام
علقت الفنانة ليلى طوبال على ايام قرطاج السينمائية قائلة إنه من غير المقبول تكريم عادل امام بتلك الطريقة والاكتفاء بتوجيه الدعوة لعملاق المسرح التونسي توفيق الجبالي.
ودونت ليلى طوبال ما يلي: "ما حبّيتش نعلّق على برشه "حاجات " في خصوص أيام قرطاج السينمائية ... من مبدأ مساندة مهرجاناتنا إلّي نعتبرها شخصيا شكل من أشكال المقاومة وباب محلول أمام الفن والحلم في وجه كل مشروع ضلامي يبغض الفن والحرية والجمال...
En passant نقول إلّي ما شفت حتى فيلم بخلاف مجموعة الأفلام القصيرة داخل المسابقة في قاعة الـ ABC وصدّقوني روّحت مهسهة كاينو واحد خبّطني بطريحة"...
وأضافت طوبال: "pour être brève فوضى عارمة على جميع المستويات...
ما شفت حتى فيلم على خاطر ما نجّمش نشدّ الصفّ ساعة... ساعتين... ثلاثة... باش قبل ما نخلط للشباك بكيلومتر يقوم واحد يصيح إلّي التساكر وفات...
إلّي حبّيت نحكي عليه اليوم الـ Polémique إلّي صايرة على عادل إمام... آما من زاوية أخرى موش مقبول اليوم وموش معقول وموش منطقي آلاف الملاين... الإستقبال... الهيلة الإعلامية لعادل إمام مقابل واحد يهزّ التاليفون ويقول للفنان الكبير العظيم توفيق الجبالي إيجا هز الدعوة متاعك مالأفريكا...
ابراهيم اللطيف كي يقول يلزم الناس هاذوما يعرفو إلّي صارت ثورة في البلاد... يسمحلي صديقي باش نقلو... قولو لروحك الكلام هذا... على خاطر كي تصير ثورة... الفنانين إلّي ثناو الرّكبة في عهد الديكتاتورية الخانقة وأبدعوا وكتبو جزء من تاريخ البلاد بفنهم وصمودهم... ما ينجّموا كان يكونوا مكرمين معززين كيفهم كيف إلّي جاين من برّة إذا موش أكثر... كرهبة ادّور تفرّق في نهارين الدعوات ماهيش باش تفلّس المهرجان... لكم نجومكم ولنا نجومنا... إلّي يمشيو يوميا عالسجاد الأحمر وهوما يعتليو مدارج الإبداع... ( وما يطيحوش)".
